KALIBO, Aklan—Nagkaeasugot ro sangguniang bayan it Kalibo, nagkaeain-eain nga Tricycle Operators and Drivers Association ukon TODA ag iba pang stakeholders sa ginpatigayon nga consultative meeting kahapon it hapon.
Suno kay SB member Matt Aaron Guzman, chairman it committee on transportation nga haeos tanan nga mga presidente it TODA nga nagtambong hay nagpasiguro nga magatau it discount sa mga estudyante.
Klaru man suno kana nga nakabutang sa naga-eksister nga ordinansa nga kinahangean nanda nga magtau it 20 porsyentong discount sa mga estudyante, senior citizen ag mga persons with disabilities ukon pwd’s.
Kaibahan sa nagtambong sa pueong hay ro representante it Department of Education, Department of the Interior and Local Government ukon DILG, Transport and Traffic Management Division it LGU-Kalibo, pilang eskwelahan ag iba pa.
Kaibahan pa sa natalakay hay ro pag-instrikto sa mga nagabiyahe nga kolorum nga tricycle.
Paga-obligahon man makaron ro mga private nga tricycle nga butangan it pangaean nga private ro andang mga saeakyan agud nga madali nga ma-identify it mga pasahero.
Mas pang pagapabaskugon ro pagdakop sa mga naga-eabag sa ordinansa kapareho it overcharging, non-conveyance ukon pagpamalibad nga magpasakay it pasahero.
Kadungan kara, gin engganyo ni SB guzman ro mga commuters nga indi magduha-duha nga i-reklamo ro mga pasaway nga tricycle drivers sa local government unit partikular sa TTMD, sangguniag bayan kamana man sa police station ag bukon it sa social media agud nga madasig nga maaksyunan ag indi eon pamarisan it iba.
