KALIBO, Aklan—Nakataeana nga magapatigayon it inspeksyon ro Department of Public Works and Highways ukon DPWH-Aklan angot sa nahugos nga portion it revetment wall sa Brgy. Mobo, Kalibo nga ginkahueog it sangka saeakyan ko nagtaliwan nga adlaw it Sabado.
Suno kay Engr. Joey Ureta, maintenance head it DPWH-Aklan nga tuyo kara nga makahimo it report nga igasumite sa regional ag central office it DPWH para sa pagtaeana it nagakaigo nga pondo .
Bangud nga patapos eon suno kana ro dag-on hay naubos eon man ro andang pondo para sa mga proyekto nga nagakinahangean it repair and rehabilitation rason nga temporary repair eon lang anay ro andang paga-obrahon pinaagi sa sand bagging .
Dugang pa nga prayoridad nanda makaron ro pag-repair it mga karsadahon nga nasamad it mga naeksperyensiyahan nga mga pagbaha ko nagtaliwan nga buean kamana man ro pag-ayos sa mga potholes.
Samtang, agud nga mataw-an it proteksyon ro mga pumueuyu, pagabutangan nanda it barrier ag signages ro apektadong lugar.
Dapat man suno kana nga maghueag ro barangay council agud nga ibawae anay temporaryo ro pag-agi sa nasambit nga lugar.
Sa pihak nga parte, agud nga mamonitor ro mga flood control projects sa aklan, padayun ro andang inventory it status and condition it mga raya agud nga matumod ro mga nagakinahangean it insigidang repair.
