KALIBO, Aklan — Puro mga istorya pa eamang ro gina-alegar nga aswang nga naispatan sa Brgy. Dumatad, Tangalan.
Suno kay Kagawad Emelith Pascual nga matapos ro insidente hay owa it sin-o man nga nag-report kanda sa barangay.
Owa man sigon it ebidensiya kapareho it litrato ukon video nga magapamatuod angot sa nakita nga aswang ni Rony Traje ko gabi-i it Domingo nga adlaw, Agosto 25 kamana man ko nagtaliwan nga adlaw sa kaiping nga lugar .
Igadangop sigon nana ro concern sa andang punong barangay agud nga makapatawag it emergency meeting ag matalakay ro mga dapat nga obrahon .
Igapatawag man sigon it konseho ro mga indibidwal nga nakakita it ginasugid nga aswang agud nga matumod ro kamatuoran .
Aminado man ro opisyal nga may ginakuno-kuno gid man nga aswang sa andang lugar, apang owa naaktuhan kapareho it natabu ko nagtaliwan nga mga adlaw.
Bangud nga nabulabog eon ro isyu sa social media, mas mayad sigon nga maging alerto sa tanan nga oras bangud nga nagtuga raya it alarma .
Matuod man sigon ukon bukon ro aswang, nagakadapat nga i-report sa mga otoridad ro mga makadueudang bagay.
Kaibahan pa sa andang plano ro pag ronda it andang mga barangay tanod agud nga mapabilin ro kaayusan ag seguridad sa lugar .
Nataeupangdan man sigon nanda ro pagronda it kapulisan pasado alas 12:00 it aga-aga sa andang lugar matapos ro insidente .
