BUSINESS News —- Agud nga mabuligan ro mga mangunguma sa pagpa-abu it pananum ag sa mahae nga presyo it mga abono ukon fertilizer hay gindihon sa Kamara ro House Bill 10700 ukon “Dangal at Sigla ng Magsasaka sa Abono Pag-asa Act”.
Tuyo it proposisyon nga maging laye ro “National Fertilizer Program” ag magplastar it mekanismo para sa implementasyon kara nga pagapanipuslan it husto it mga mangunguma nga apektado it nagataas nga balor it abono ag COVID-19 pandemic.
Kaibahan sa ginapasiguro it proposisyon hay ro “access” it mga mangunguma sa mga abono ag mabuligan sanda nga mapataas ukon mapa-abu ro produksyon it paeay ag iba pang produkto.
Ginaduso man sa proposisyon ro mga locally-produced nga mga abono nga mataas ro kalidad apang masarangan sa boesa ro presyo.
Eabaw sa tanan, may una man nga “fertilizer subsidy” para sa mga kwalipikadong mangunguma eabi eon sa tiempo nga mataas ro presyo it abono sa merkado.
Naga-abot man sa ₱20 billion pesos ro proposed budget para sa implementasyon kara.
