KALIBO, Aklan—Nagapabilin nga ro National Capital Region ukon NCR ro may pinakamataas nga tourist arrivals sa isla it boracay ko nagtaliwan nga buean it Setyembre.
Suno kay Malay Tourism Officer Felix Delos Santos nga ro top 3 markets ko nagtaliwan nga buean hay ro NCR nga may 4,614, sumunod ro mga Aklanon nga may 555 ag Central Luzon nga may 503.
Sa kabilugan hay 6,702 ro nailistang inbound visitors.
Raya hay nagakahueugan nga naga-average sa 300 hasta 600 ro mga turista nga nagasueod sa boracay kada adlaw.
Raya hay maeayo sa 800 hasta 1,000 per day nga tourist arrivals nga nailista kat nakapaidaeum sa GCQ ro NCR.
Ko Oktubre 1 hasta 5, ro tourist arrivals hay naga-abot eon sa 3,057 eon.
Samtang, ginpahayag ni Delos Santos nga mabahoe ro andang pagpasaeamat matapos nga uman nga ginhaeugaan ro travel restrictions sa siyudad ag probinsiya it iloilo kamana man sa NCR sa pihak nga may ginapatuman nga age restrictions sa idaeum it alert level 4.
Ginaeauman nga medyu mabudlay pa makaron nga mapataas it husto ro numero it mga bisita bangud sa age restrictions sa NCR kun sa siin kaabuan kanda hay nagabakasyon nga magpamilya.
Owa man sigon it ginbag-o sa mga requirements sa pagsueod sa isla it boracay para sa mga non-aklanon tourists.
Samtang owa pa suno kana ginapatuman it national IATF ro unified nga vaccination card hay padayun nga iga-require ro negatibong RT-PCR test.
