KALIBO, Aklan—Mabahoe ro pagduda ni Sangguniang Bayan member Rolly Equiña Jr. it banwa it New Washington nga may eamod pulitika ro alegasyon nga imaw ro utok it nagkalhit nga fake news nga coronavirus disease ukon COVID-19 positive ro mag-asawa nga taga-brgy. pinamuk-an sa nasambit nga banwa.
Nasayuran nga nag-eupok ro isyu ko nagtaliwan nga abril 5 matapos nga magpangayo kana it bulig ro andang kaeapit baeay nga mapa-check-up ro anang tiyo nga nakaexperiensiya it kabudlay sa pagginhaw nga ko ulihi hay natukiban nga may tuberculosis.
Sa interview it Bombo Radyo, ginpahayag ni equiña nga posibleng may halong pulitika ro pagtuhaw it nasambit nga isyu.
Nagakangawa sigon imaw matapos nga maging sueod it mga komentaryo it pilang radio station nga imaw ro mastermind it fake news, apang sa ginpatigayon nga session ko nagtaliwan nga adlaw, gin-insister it anang mga kaibahan nga ginapa-imbestigahan pa eamang ro nasambit nga isyu pinaagi sa andang gindihon nga resolusyon.
Mabahoe man nga palaisipan sa opisyal kon ham-an nga nakaangkon imaw it koneksyon kay Ronald Reyes Gumboc, ro ginaturo nga nag-post it mensahe sa social media sa pihak nga owa man sanda it komunikasyon sa kada isaea.
Ginpaathag pa ni Equiña nga ro nagakatabu makaron hay bukon it mayad nga halimbawa sa andang mga constituents bangud nga sanda-sanda man ro naga-inaway sa tunga it ginapangatubang nga krisis.
Suno kana nga haum imaw nga magpakulong engkaso nga makapaguwa it ebidensiya ro konseho nga imaw ro mastermind sa isyu.
Pahayag pa ni Equiña nga posibleng may nagsuesoe sa mga raya agud nga imaw hay samaran.
