BALITANG Espesyal —- Sangka eaeaki ro nagpa-check-up sa New York hospital bangud sa kabudlay sa pagginhawa .
Apang sa pagtan-aw kana it mga doktor nakibot sanda matapos nga matukiban nga may sangka ngipon nga nagtubo sa anang nasal cavity sa tu-o nga nostril it anang ilong.
Ginpahayag nanday Dr. Sagar Khanna ag Michael Turner, surgeons sa Mount Sinai Health System sa New York, base sa case study nga naka-published sa New England Journal of Medicine nga nagdangop kanda ro 38-anyos nga eaeaki bangud sa kabudlay nga pagginhawa sa anang tuo nga nostril may pilang dag-on eon ro nagtaliwan .
Nadiskubre it mga doktor nga may anang deviated septum , sangka kundisyon kun sa siin ro partition sa tunga it nasal passages hay ginatueod sa sangka parte.
Insigidang ginpatigayon ro rhinoscopy nga may maisot nga camera ag natukiban ro mga kabangdanan.
Sangka ngipon ro nagatubo sa floor it anang tuo nga nostril.
Ro ectopic tooth, sangka termino para sa nagatubo nga ngipon sa abnormal nga lugar hay may sukat nga .6 inch long.
Gindugang pa it mga surgeons nga ginbo-oe nanda ro ngipon nga owa it anuman nga komplikasyon .
Ro eaeaki hay uman nga nagbalik para sa follow-up visit may tatlong buean eon ro nagtaliwan pagkatapos it procedure ro eubus nga nalipay bangud nga nakaginhawa eon imaw it normal pinaagi sa anang magtimbang nga nostrils ukon buho it anang ilong.
