KALIBO, Aklan — Padayun nga ginatugis it pulisya ro sangka notorious nga manakaw matapos nga makapaeagiw sa ginkasa nga hot pursuit operation bandang alas-11:00 it gabi-i sa Purok 4 C. Laserna St. Kalibo, Aklan.
Suno kay P/Staff Sergeant Eric John de Lemos it theft and robbery section it Kalibo Police Station nga matapos nga matumod ro ginakahimtangan it suspek nga nakilaea kay Nino dela Rosa, residente man it nasambit nga lugar hay insigida sanda nga nagpatigayon it operasyon .
Apang natunugan kara ro pag-abot it kapulisan ag nakadaeagan.
Samtang nga naga-eskapo , gina-alegar nga nagpaeupok raya it anang daea nga baril rason nga nagbaeos man ro mga otoridad .
Suno kay de Lemos nga sa mayad nga swerte hay owa it sibilyan nga nadaeahig sa insidente maskin nga residential area ro lugar .
Nasayuran nga ro suspek hay nauna eon nga naitsurahan it mga otoridad sa CCTV footage matapos nga takawan ro sangka panimaeay ko nagtaliwan nga adlaw .
Angot kara, nag-apela si de Lemos sa mga nagatago sa suspek nga isurender raya sa mga otoridad .
