KALIBO, Aklan–Ginpaathag it sangka negosyante it baboy sa Kalibo public market nga normal kada dag-on ro pagnaba sa presyo it pagbinaeak-ean it buhi nga baboy it mga trader.
Suno kay Elmer Villanueva, raya hay kasunod sa pagtipid it mga konsumidor bangud nga ro andang prayoridad makaron hay ro pagbayad sa eskwelahan.
Imbes nga ro budget nga pambakae it karneng baboy hay ginatigana anay sa tuition it andang mga onga nga magasueod sa pagbukas it klase ag ro iba hay ko nagtaliwan nga graduation.
Ginpamalibaran man kara ro nagaguwang isyu nga ginakueang it supply it baboy ro probinsya it Aklan rason nga mahae gihapon ro baligya it karne maskin nga barato ro bakae sa buhi nga baboy.
Gin-insister ni Villanueva nga halin sa buean it Hunyo hasta it Agosto hay normal nga naganaba ro presyo it baboy bangud nga ginakabig raya nga off season apang gulpi man raya nga magataas sa pagsueod it Setyembre bangud sa tig-aeana hasta eon sa tyempo it paskwa.
Sa 12 anyos nga pagiging vendor it karneng baboy sa Kalibo public market hay uwa eon imaw nagakangawa nga nagaabot ro makarundaya nga sitwasyon kon siin ro sambilog nga baboy hay inde pa nanda raya haeos maubos it pagbaligya sa sueod it sang adlaw partikular sa mga raya nga buean.
