KALIBO, Aklan—Ginpahayag it Department of Social Welfare and Development ukon DSWD Region 6 nga temporaryo eon nanda nga ginsarado ro andang online registration para sa ginapanupod nga bulig pinansiyal sa mga pigado nga estudyante.
Raya hay sa pihak nga ro distribusyon it ayuda hay hasta pa sa Setyembre 24.
Suno kay Atty. May Rago-Castillo, tagapaghambae it DSWD-region 6 nga naga-abot sa 591,744 ro andang nabaton nga online applicants.
Sa nasambit nga numero, 43,820 pa eamang ro na-cross match ukon nausisa samtang 547,924 ro owa.
Sa pihak nga parte, sa kabilugan nga 24,819 nga na-crossmatch para sa assessment ag pay-out, ro target eamang nanda nga mataw-an it financial assistance sa maabot nga sabado, setyembre 10 sa bilog nga western visayas hay 9,734.
Sa nasambit nga numero, 301 eon lang ro mataw-an it ayuda sa probinsiya it Aklan , 768 sa Antique, 701 sa Capiz, 507 sa siyudad it Iloilo, 2,116 sa Iloilo province , 4,741 sa Negros Occidental ag 500 sa Bacolod City.
Gindugang pa kara nga nag-request eon sanda it dugang nga pondo para sa nabilin nga daywang sabado nga pay-out .
Ginpaathag ni atty castillo nga ro DSWD region 6 ro may pinakamataas sa disbursement rate ag sa numero it mga beneficiaries sa bilog nga nasyon.
Sa Aklan ro pay-out center hay sa sabado hay sa ABL Sports and Cultural Complex.
Ro education assistance hay sambilog sa mga regular nga programa nga ginapatuman it DSWD apang makaron eamang nga dag-on na-hype ag nakampanya it todo rason nga gindagsa it mga estudyante ag mga ginikanan.
