KALIBO, Aklan—Posibleng madugangan pa ro reward money para sa madasig nga pagka-aresto sa killer it 23-anyos nga pawnshop manager-reliever nga si Bonna Hercia Ambay.
Raya hay matapos nga nagpromisa si sangguniang panlalawigan member Nemesio Neron it dugang nga P10,000 nga padya.
Apang paga-istoryahon pa sigon nana ro anang mga kaibahan sa provincial board agud nga madugangan pa ro nasambit nga kantidad.
Nasayuran nga naga-abot eon sa P120,000 ro reward para sa sin-o man nga makatau it impormasyon angot sa brutal nga pagpatay sa biktima sa sueod mismo it anang ginatrabahuhan nga branch it RD pawnshop sa Mabini St. Kalibo.
Nauna eon nga nag-offer it P30,000 nga reward si incoming Kalibo Mayor Juris Sucro para sa insigidang pagkadakop sa ginakabig nga ”person of interest” nga si Mark Archie Torrefiel, 31, it Brgy. Cajilo, Makato ag naka-duty nga gwardiya sa nasambit nga pawnshop kat matabu ro krimen.
Sumunod kara, nagtau man ro mga igbata it biktima it dugang nga P60,000 ag ro sangka anonymous nga nagdugang man it P30,000.
Ginpahayag ni board member Neron, chairman it committee on peace and order nga tuyo kara nga magaserbing paandam sa mga nagaplano nga maghimo it makangieidlis nga krimen.
Madumduman nga nasapwan nga nagapaligos sa anang kaugalingon nga dugo ro biktimang tumandok it Brgy. Nauring, Pandan, Antique, Lunes it agahon, apang ginapatihan nga domingo pa it hapon raya ginpatay.
