REGIONAL News — Nagapanawagan ro 3rd Infantry Division it Philippine Army ag Police Regional Office (PRO-6) sa mga kandidato sa paeaabuton nga 2025 midterm elections nga likawan ro pagtau it “campaign fees” sa mga miyembro it New People’s Army (NPA).
Suno kay Colonel J-Jay Javines, spokesperson it 3ID, ro mga kandidato nga magatanyag it kwarta sa mga rebelde hay pwedeng makasuhan it “conspiracy to commit rebellion.”
Dugang pa nana nga raya hay posibleng masae-an nga pagbulig sa kawsa it NPA pinaagi sa andang pagtau it bulig pinansyal.
Dugang pa it opisyal nga magapatigayon it hugut nga pagbantay ro mga soldado kun sa siin ginapatihan nga aktibo ro mga NPA.
Samtang, ginpahayag man ni Police Brigadier General Jack Wanky, direktor it PRO-6, sa mga pulitiko nga kontrahon ro anuman nga demanda halin sa mga rebeldeng grupo.
Ginpaandaman man it PRO-6 chief ro mga incumbent official nga posibleng maeabag nanda ro Code of Conduct and Ethical Standards for Government Officials.
Ro filing it certificate of candidacy (COC) hay maga-umpisa eon sa Oktubre 1 hasta 8, 2024. via Panay News
