KALIBO, Aklan—Ginbulgar ni punong barangay Rafael Briones it Briones, Kalibo ro pilang anomaliya nga nagakatabu sa pabaeay it National Housing Authority (NHA) sa nasambit nga lugar.
Raya hay matapos nga matukiban nana nga may pilang beneficiary ro nagapa-renta it andang unit sa balor nga P500 pesos kada buean.
Suno kay kapitan Briones nga sangka babaye ro nagpa-blotter sa andang barangay hall matapos nga gina-alegar nga gina-harrass it nagapanag-iya it unit.
Base sa reklamo, pilit sigon nga ginbalik ro advance payment it tagreklamo nga P1,500 pesos agud nga maghalin eon sanda sa nasambit nga lugar.
Nagapati ro opisyal nga ginhimo raya it beneficiary matapos nga mabulgar ro anang gin-obra nga pagpa-renta sa anang unit nga sangka pag-eabag sa ginsudlan nga kasugtanan sa NHA.
Ginpaathag pa ni Briones nga may posibilidad nga pagaboe-on ag pagabayluhan it NHA ro mga beneficiary nga gina-obra nga paeangitan-an ro pagparenta it andang housing units bangud nga nagapakita eamang nga kon owa nanda gina-istaran ro gintau kanda nga pabaeay hay bukon nanda raya it kinahangean.
