KALIBO, Aklan—Haeos mabudlay eon nga mapatihan ro mga pahayag it mag-amang Pangueong Rodrigo Duterte ag Davao City mayor Sara Duterte-Carpio.
Raya hay angot sa pabag-o-bag-o nanda nga statement sa publiko may kahilabtanan sa andang mga plano sa maabot nga eleksyon sa 2022.
Nauna nga ginhambae ni Pangueong Duterte nga maga-retiro eon imaw sa pulitika, apang makaron hay nag-file it COC sa pagka-senador kamana man ro anang unga nga si Sara nga ko una hay todo-balibad pa nga magapadaeagan sa national position, apang ka-tandem makaron ni presidential aspirant Bong-bong Marcos.
Suno kay sangguniang panlalawigan member ag 1st district congressional candidate Atty. Harry Sucgang nga ro pahayag it mag-ama hay indi eon masaligan ag matsa nagapataeang it publiko.
Makabig suno kana nga kwestiyunabli ro kredibilidad it mag-ama partikular ni pangueong Duterte.
Samtang, nagapati si Atty. Sucgang nga ginahimo makaron it administrasyon ro tanan nga mga istratehiya sa pulitika agud nga magapabilin sa gahum ag mailikaw si Duterte sa sangkaterbang kaso engkaso nga magdaog ro oposisyon.
Ginsuhestiyon pa nana nga magbasa ro mga pamatan-on angot sa matuod nga natabu ko martial law agud nga eubusan nga masayuran ro gin-obra it pamilya Marcos sa Pilipinas.
Bangud kara, plano ni Atty. Sucgang nga engkaso nga paearon sa maabot nga eleksyon hay igaduso nana sa manaba nga kapueongan it kongreso ro pagreporma sa electoral ag education system agud nga mabugtaw ro mga ulihing henerasyon sa tama nga pagbinatasan.
