KALIBO, Aklan—Mabahoe ro magiging impact sa cost of living it mga Pinoy partikular sa mga immigrants ag international student ro naging anunsyo ni Canadian Prime Minister Justin Trudeau nga pag-imponer it 25 percent nga taripa sa mga produkto nga magahalin sa Estados Unidos bilang baeos sa nauna eon man nga anunsyo ni US President Donald Trump.
Maskin nga ginpaiway it 30 diyas ro pag-imponer it taripa, ginpahayag ni Bombo International Correspondent Cherry Mae Regalado, pencak silat princess ag presenteng naga-eskwela sa Vancouver, Canada nga mabahoe gihapon kara ro epekto sa presyo it mga nagapangunang baeak-eon partikular sa presyo it petrolyo nga makaapekto sa sektor it transportasyon.
Makaron pa eamang sigon hay ginareklamo eon idto sa nasambit nga lugar ro cost of living partikular sa Vancouver kon ikumpara sa ibang probinsya it nasyon.
Ginaekspektar eon sigon nanda makaron ro doble nga gastos bangud sa ginaeauman nga pagmahae it mga baeak-eon kapin eon sa mga baligyaan nga US based nga masaming gina-shoppingan it mga Pinoy sa nasambit nga lugar.
Madumduman nga sa naging pueong it daywang lider, bilang kabaylo sa tariff pause hay pagapabaskugon it Canada ro pagbantay sa border.
Magatingob puwersa ro andang soldado ag US Joint Strike force para suk-ean ro pagsueod it fentanyl, money laundering ag suk-ean ro organized crime.
