KALIBO, Aklan—Ginakabig it Makabayan Bloc nga “diversionary tactics” eamang it administrasyong Duterte ro pag-revoke it amnesty kay Sen. Antonio Trillanes IV bangud sa ginapangatubang nga problema it nasyon.
Suno kay Makabayan Rep. Ariel Casilao sa interview it Bombo Radyo Kalibo, pila sa mga nasambitang problema hay ro pagsikad it inflation rate sa 6.4% sa buean it Agosto; pagnubo ko baylo it Piso ag ro padayon nga pagtaas it mga produktong petrolyo sa world market.
Dugang pa ni Casilao, kaparte man sigon raya it pag-pressure ni Pangueong Rodrigo Duterte sa anang mga kritiko nga nagapamaeabag sa anang polisiya.
Bukon eamang sigon it si Trillanes ro nakaeksperyensya it kaparehas kara kundi maging si Sen. Leila De Lima ag ro Makabayan Bloc 4 nga ginkasuhan it rebelyon ko nagtaliwan nga buean.
Samtang, bukon eon sigon it bag-o ro tikang ni Duterte ag mas magalala pa raya sa masunod nga mga inadlaw.
