KALIBO, Aklan–Makabig nga makakilibot ro natabu nga pagbaril-patay kay dating Japanese prime minister Shinzo Abe.
Raya ro ginpahayag ni Atty. Plaridel Morania, sangka batikang abogado sa Aklan.
Suno kana nga ro Japan hay owa it masyadong nailistang krimen sa bilog nga dag-on bangud nga masyadong instrikto ro andang gobyerno sa paghupot it baril it mga pumueuyu.
Mag-eowas kara, masyado man sigon nga disiplinado ro mga hapones ag may mabahoe nga pag-ulikid sa isigkatawo.
Sa batasan eon suno kana it mga Japanese ro pagsunod sa rules maskin sa numero it andang dapat nga maging unga.
Naging uso sigon ro hara-kiri ukon pag-suicide kon mataw-an it kahuy-anan ro pamilya.
Ginsaysay pa ni Atty. Morania nga pagkatapos it world war II , ro japan ro pinaka-pobre ag pinakanahalitan nga nasyon.
Apang makataliwan suno kana ro 40 anyos hay uman sanda nga nakabangon ag naging numero uno sa car manufacturing, electronics, ship building ag iba pa rason nga nag-umwad ro andang ekonomiya.
Madumduman nga ginbaril it 41 anyos nga si Tetsuya Yamagami ro dating prime minister nga si Shinzo Abe gamit ro sangka handmade nga baril sa sangka campaign event kahapon maeapit sa istasyon it tren sa siyudad it Nara.
