KALIBO, Aklan—Gin-describe ni Bombo International Correspondent Greg Aguilar nga masyadong peligroso ro gin-obra nga sorpresang pagbisita ni US President Joe Biden sa Ukraine.
Suno kana nga si Biden ro kauna-unahan nga US president nga nagbisita sa sangka war zone nga bukon it kontrolado it tropa it Amerika.
Sa mayad nga swerte suno kana ag owa naisipan it Russia nga atakehon ro Kyiv samtang nagabisita si Biden bangud nga kon natabu hay posibleng giyera ro naging resulta.
Ginpahayag dugang ni Aguilar nga ro pagbisita hay agud nga ipakita ro mabahoe nga suporta it US kay Ukrainian President Volodymyr Zelensky sa nagahilapit nga anibersaryo it pag-atake it Russia sa Ukraine.
Gintalakay nanday Biden ag Zelensky ro may kaangtanan sa isyu it long-range weapons.
Nasayuran nga dugang nga 500 million dollars it military supply ro uman nga gintau it US sa Ukraine.
Raya hay mag-eowas pa sa 30 billion dollars nga bulig militar ag financial assistance.
Gin-obra ni Biden ro pagbisita sa Ukraine sang adlaw antes ro naging major address ni Russian President Vladimir Putin.
Madumduman nga Pebrero 24 kat atakihon it Russia ro Ukraine.
Samtang, nagapati si Aguilar nga medyu tagilid makaron ro Russia sa pagka-ubos it andang kwarta ag soldado bangud sa padayon nga pagkamatay it maabu nanda nga mga Russian soldiers kamana man ro pagdeploy sa war zone it mga bag-ong recruit nga soldado maskin nga owa it nagakaigo nga training.
Matsa imposible man sigon nga maggamit it armas nukleyar ro Russia bangud nga siguradong pagakundinahon sanda it bilog nga kalibutan.
