Ginpilahan ag gindagsa it maabong parokyano ro kauna-unahang horror house sa banwa it Kalibo.
Raya hay ginbuksan kahapon bandang alas-5:00 it hapon ag magasarado it alas-12:00 it tungang gabie nga magabuhay hasta sa Nobyembre 1.
Ro bag-ong atraksyon sa Kalibo hay kaparte it nagahilapit nga pyesta minatay kon siin inisyatibo raya it lokal nga gobyerno.
Suno kay Carla Doromal, executive assistant 1 it office of the mayor nga “blockbuster” ro pila it mga gustong makasueod sa horror house kon siin kaeabanan sa mga raya hay mga pamatan-on.
Sa haega nga P50 pesos nga entrance fee hay uwa nagpaawat ro mga raya sa pihak it maueanon nga panyempo.
Ginpahayag dugang ni Doromal nga maabong exciting part ro nagahueat sa sueod kon siin ginsiguro sigon ni Kalibo mayor Juris Sucro nga maging organize ro tanan para malikawan ro aksidente ag insidente.
Antes makasueod hay may waiver nga ginapirmahan ag bawae ro mga may sakit sa tagipusuon.
Bawae man magdaea it gamit sa sueod partikular it cellphone.
Ro kita halin sa entrance fee hay igabayad sa mga talent, actors ag operations kamana man sa charities.
