KALIBO, Aklan–Kabilugan nga naging malinong ag matawhay ro unang daywang adlaw it pag-umpisa it klase para sa School Year 2022 to 2023 sa bilog nga Western Visayas.
Suno kay Hernani Escullar Jr. tagapaghambae it Department of Education (DepEd)-6 nga naging maayos ro daeagan it uman nga pagpatigayun it limited face-to-face classes sa kada eskwelahan.
Sa pihak kara, gin-aku ni Escullar nga nakalista sanda it pilang minor problem kapareho it mga learners nga naduea ukon owa naeakip sa listahan it mga naka-enroll apang insigida man nga nasolbar.
Base sa datus, naga-abot eon sa kabilugan nga 2,233,946 ro mga estudyante nga naka-enroll sa mga pampublikong eskwelahan sa bilog ga reihyon.
Ro nasambit nga numero hay mas mataas kumpara ko nagtaliwan nga School Year.
Posible sigon nga sambilog sa nakaapekto kara hay ro amat-amat nga pagbalik sa trabaho it mga ginikanan kung siin ro pilang estudyante hay nataw-an it kahigayunan nga makabalik sa eskwelahan kamana man ro owa pag-require it uniform.
