KALIBO, Aklan — Ginatutukan makaron it Bureau of Fire Protection (BFP)-Aklan ro anggulo nga sa sueod it stall naghalin ro kaeayo nga nag-ugdaw sa haeos 80 porsyento it Kalibo public market.
Raya hay suno kay Provincial Fire Marshall Superintendent Nazrudyn Cablayan kasunod sa nagapadayon nga imbestigasyon it andang taeatapan matapos nga mabueo tanan ro statement it gwardya ag mga witnesses.
Sa makaron suno kana hay uwa pa naka-appear sa andang taeatapan ro tag-iya it nasambit nga pwesto agud nga maboe-an it affidavit.
Ginkumpirma kara nga ro unang ginpaguwa nga inisyal nga gintunaan it kaeayo hay naghalin sa electrical paadto sa pwesto it mga vendors apang ko ulihi hay nagguwa ro anggulo nga sa sangka stall naghalin ro kaeayo partikular maeapit sa mga tsinelasan.
Posible sa masunod nga mga dinominggo hay makapaguwa eon sanda it progress report agud nga maumpisahan it lokal nga gobyerno it Kalibo ro re-construction it pampublikong merkado.
Sa makaron suno kana hay nagapabilin sa P35 milyon ro danyos it sunog apang posibleng madugangan kon maita-o eon it iba pang negosyante ag vendors ro balor it andang mga baligya nga nagkaeasunog.
Sa pihak nga parte, agud nga inde eon mauman ro nasambit nga sunog, igasuhestyon it ahensya sa lokal nga gobyerno nga dapat makaangkon it dugang nga fire hydrant maeapit sa tindahan ag pagabutangan it sprinkler system kamana man fire detection alarm system ro iga-reconstruct kara nga public market para sa kasiguraduhan it pangabuhian it mga stallholders.
