KALIBO, Aklan–Makabig nga bentaha para sa gobyerno engkaso nga mapaiway ro nagahilapit nga Barangay ag Sangguniang Kabataan (SK) elections sa Disyembre 5, 2022.
Raya ro pagpati ni Kalibo Sangguniang Bayan member Ronald Marte bangud makatipid ro gobyerno it mabahoe nga haega nga pwedeng magamit sa iba pang programa ag proyekto.
Pabor man sigon raya sa mga presenteng nagapungko nga barangay officials bangud mataw-an pa sanda it kahigayunan para mapaeawig ro pagserbisyo.
Apang, dis-bentaha man sigon raya sa mga pumueoyo eabi eon kung owa naga-perform it husto ro andang mga opisyal sa barangay.
Nasayuran nga gin-aprubahan eon it House Committee on Suffrage and Electoral Reforms ro proposisyon nga pagpaiway it Barangay ag SK Elections.
Aprubado man it komite ro probisyon para i-repeal ro presenteng laye para sa December 2022 elections ag gin-eakip eon ro “holdover positions” kung siin ro mga incumbent barangay officials hay magapabilin sa pwesto hasta nga mailihir ro mga bag-ong opisyal sa Disyembre 2023 mag-euwas kung sanda hay ginpahalin sa pwesto.
