KALIBO, Aklan—Ginpaathag ni Atty. Axel Gonzales nga ro pagpost it bail ukon piyansa hay sangka kinamatarung nga nakabaehag sa Article III, Section 13.
Suno kana nga ro sin-o man nga akusado it krimen hay pwedeng magpiyansa mag-eowas eon lang kon raya hay gina-akusahan it krimeng ro penalidad hay reclusion perpetua ag mabaskog ro ebidensya kontra kara.
Raya hay kasunod it pagpabor it sangka korte sa Taguig City sa hirit it actor/host nga si Vhong Navarro nga makapag-piyansa it sang milyong piso sa ginapangatubang nga kasong rape para sa anang temporaryong kahilwayan.
Base suno kana sa desisyon it judge nga nagabuyot sa kaso, owa imaw it nakikita nga iba pang mabug-at nga ebidensiya nga magahambae nga gin-obra gid man ni Navarro ro alegasyon kana it modelong si Deniece Cornejo nga ginhimuslan nana raya.
Sa pihak kara, nagpamalibad eon si Atty. Gonzales nga magtau it iba pang detalye bangud nga sa korte eon ro kaso.
