KALIBO, Aklan–Kasunod it paghalin sa pwesto ni Barangay kagawad Mark Sy it Poblacion, Kalibo hay nag-resign man sa andang natungdan nga serbisyo ro andang Barangay Treasurer ag Secretary.
Raya ro ginkumpirma ni Punong barangay Niel Candelario.
Suno kana nga may nagbukas nga mga bag-ong oportunidad sa daywang nasambit nga mga dating empleyado it barangay rason nga naghalin sa pwesto.
Ginasugid nga nakaangkon it trabaho sa lokal nga munisipyo it Kalibo ro nagresign nga barangay secretary nga si Jonel samtang ro barangay treasurer nga si Alex Cordero hay sa sangka pribadong kompaniya.
Angot kara, ginduea ni Kapitan Candelario ro mga espekulasyon nga may mga isyu sa barangay rason it sunod-sunod nga paghalin it mga empleyado.
Sa kamatuoran suno kana hay nagpasugot ro mga raya nga ma-extend ro andang pagserbisyo matapos nana nga ginhinyu nga tapuson anay ro andang mga paper works.
Suportado sigon nana ro plano it mga raya bangud nga nasayuran kara nga owa it security of tenure sa barangay council bangud nga kaabuan kanda hay co-terminos nga ginatawag.
Samtang , ro mga nabakanteng pwesto hay natigayon eon nga mapun-an.
