KALIBO,Aklan– Uwa eon ginkakibot it mga drivers/operators ro panibag-o eon man nga pagsaka sa presyo it produktong petrolyo.
Suno kay Rodrigo Almojen Jr., chairman it Banga-Kalibo Jeepney Transport Service Cooperative nga uwa sanda it mahimo sa haeos daywang piso nga pagsaka sa presyo it diesel ag gasolina bangud nga inde magdaeagan ro andang mga saeakyan nga ginamaneho kon inde pagtaynan it petrolyo.
Aminado si Almojen nga dugang paeas-anon sa andang parte ro pagsaka sa presyo it nasambit nga produkto apang raya ro andang pangabuhian rason nga kinahang-ean nanda nga makipagsabayan.
Sa pihak kara, ginklaro nana nga uwa it pagsaka ro pamasahe it mga commuters maskin nga kada dominggo nagasaka ro presyo it produktong petrolyo.
Nasayuran nga ginpatuman ro dugang nga P1.90 sa kada litro it gasolina samtang P2.10 mat-a ro gintaas sa kada litro it diesel ag P1.80 ro ginsaka sa presyo sa kada litro it kerosene.
Paathag it Department of Energy nga ro pagsikad it presyo kara sa world market ag mataas nga demand sa China ro rason it pagtaas it presyo it mga produktong petrolyo.
