Kalibo Aklan —— Magapadayon hasta sa Abril 30 it presenteng dag-on ro pagserbisyo it mga tricycle driver sa mga pumueoyo nga nagakinahang-ean it behikulo sa natungdan nga barangay agud nga makapamaeak-eon sa banwa it Kalibo.
Raya hay kasunod it anunsyo nga ginpaeawig pa it daywang dominggo ro Enhanced Community Quarantine sa bilog nga probinsya it Aklan.
Ro daywang ka tricycle nga gintaeana sa kada barangay hay magabyahe agud nga magahatod it mga pasahero paadto sa banwa ag pauli sa andang residensya nga uwa it kinahang-ean nga bayaran nga pamasahe ro pasahero halin alas-6:00 it agahon hasta alas-6:00 it hapon.
Raya hay matapos nga gin-ako it lokal nga gobyerno it Kalibo nga imaw ro magata-o it subsidiya sa mga tricycle driver bilang bulig eon man sa andang pangabuhian matapos nga naapektuhan ro mga raya it ECQ tuga it 2019 coronavirus disease (COVID-19) pandemic.
Ro mga awtorisadong behikulo hay may nakasab-it nga tarpaulin nga kulay dueaw bilang pamatuod nga sanda ro gintaw-an it authority sa andang barangay nga magservice sa mga pasahero nga may kinahang-ean nga bak-eon sa banwa it Kalibo.
