Kalibo Aklan——Pagamultahan eon ro mga nagaguwa sa baeay nga owa it suksok nga face mask sa probinsiya it Aklan.
Ginpasa eon it Sangguniang Panlalawigan (SP) ro ordinansa nga nagamandu sa mga residente nga magsuksok it face masks kada nagaguwa it andang natungdan nga mga baeay.
Sa idaeum it Ordinance No. 2020-006, tanan nga mga tawo sa bilog nga nasakupan it probinsiya hay kinahangean nga magsuksok it face masks agud nga malikawan ro pagkalhit it coronavirus disease 2019 (COVID-19).
Ro mga residente ag trabahador nga owa it masks hay pwedeng maggamit it panyo, ear-loop masks, scarfs, cloth masks ukon do-it-yourself (DIY) masks.
Samtang, ro mga unang beses nga maka-eabag sa ordinansa hay paga-warningan anay, apang sa ikaywang offense hay pagapapanaugan it multang P1,000 ukon limang oras nga community service samtang P2,000 ukon waeong oras nga community service sa third offense ag kasunod pa nga pagkasaea.
Sa pihak nga parte, pagamultahan man ro mga commercial establishments nga magapasueod it customer nga owa it suksok nga face masks it P5,000 sa kada pag-eabag.
