KALIBO, Aklan–Padayun nga ginabueong sa sangka ospital ro pahinante it sangka wing van matapos nga nahueog ro andang saeakyan sa kilid it diversion road ag bumangga sa sangka puno bandang alas-4:30 kaina it agahon sa barangay Tagas sa banwa it Tangalan.
Ginkilaea ro naninahan nga biktima nga si Rey Bagohara, 34 anyos ag residente it Roxas City, Capiz samtang ro driver nga nga igmanghud kara hay nakilaea kay Frederick Bagohara, 29 anyos it Batasan Hills, Quezon City.
Ginasugid nga gina reklamo it pahinante ro pagsakit it anang likod partikular sa anang spinal cord matapos nga gina alegar nga inapok raya paguwa it saeakyan.
Samtang, ginpahayag ni Roding Talaoc, residente sa lugar nga samtang nagapahaum nga magbangon kaina it agahon hay nakabati raya it mabaskog nga eagabong ag sa anang pagguwa sa andang baeay hay nakita kara ro saeakyan nga gin-arado eon ro concrete railings ag nakasubsob sa puno it boyboy.
Gin aku sigon kana it driver nga samtang nagamaneho hay nakatueugan raya.
Ro wing van hay halin sa Iloilo ag ginasugid nga nagahingabot it andang biyahe paagto sa Caticlan Jetty Port.
Ro driver ag pahinante hay insigidang gindaea sa ospital it rumespondeng MDRRMO personnel ag kapulisan.
Sa pihak nga parte, sa imbestigasyon it Tangalan municipal police station, nagatuhaw nga self accident ro natabu.
Suno kay P/Capt. Aubrey Ayon, hepe it Tangalan PNP nga aminado ro driver nga bangud sa kagaoy hay nakatueog imaw samtang nagabiyahe kamana man nga medyu may kadasigon ro daeagan it anang saeakyan.
