KALIBO, Aklan—Kasunod it uman nga pagbangon it industrisya it turismo sa isla it Boracay hay ro pagdagsa it maabong mga turista maghalin sa nagkaeain-eain nga nasyon sa bilog nga kalibutan.
Bangud kara, ginpanugyan ni Ambassador Imtiaz Ahmad Kazi it Pakistan sa lokal nga gobyerno it Malay ag maging sa gobyerno probinsyal it Aklan nga amligan it husto ro environment agud nga inde maduea ro ginapabugae nga puti ag malaposbos nga baeas, malinaw ag mala-asul nga tubi-dagat ag ro mga coral reefs nga ginaistaran it isda ag ro iba pang lamang dagat.
Ginpahayag it Pakistani ambassador nga base sa anang pag-usisa hay raya ro masami nga ginabalik-balikan it mga turista rason nga kinahang-ean raya nga amligan.
Mag-eowas kara, ginkalipay man nana ro nakit-an nga electric tricycle eon ro ginagamit nga transportasyon sa isla bangud nga mabahoe raya nga bulig nga makabuhi sa polusyon sa sikat nga Boracay.
Samtang sa pihak nga parte, kinahang-ean suno kana nga ipreserba ag taw-an it importansya ro mga Ati bilang sinaunang tawo sa Isla.
Nagpahayag man it interes ro Pakistani ambassador nga makatambong sa Ati-Atihan festival it banwa it Kalibo nga ginakabig man nga Mother of All Philippine Festivals.
Suno kana, sambilog man raya sa mga ginadayo it mga turista nga festivals nga mas kapin pang pasanyugon agud nga makaengganyo it mas maabo pang mga dumueoong turista.
Ro Pakistani ambassador hay sambilog sa mga dinapit nga bisita sa ginpatigayon nga Diplomatic and Business Forum nga ginhiwat sa Belmont Hotel sa isla it Boracay.
