KALIBO, Aklan—Hasta eon lang hin-aga nga adlaw it Miyerkules, Hunyo 11 ro pagpasa it Statements of Contributions and Expenditures ukon SOCE it mga kandidato ko 2025 midterm elections.
Suno kay Atty. Christian Itulid, municipal election officer it Commission on Elections ukon COMELEC-Kalibo nga sa 22 nga mga nagpa-ilihir sa banwa it Kalibo hay pito pa eamang ro nakasumite it SOCE.
Raya hay ginaeakipan it sangka kandidato nga mayor, sangka vice mayor ag limang sangguniang bayan members.
Saog man ukon piyerde sa eleksyon, kinahangean suno kana nga magsumite it SOCE agud nga indi makasuhan it administratibo sandig sa Section 14 it Republic Act No. 7166.
Ro indi makasumite it SOCE hay posibleng magresulta sa multang P1,000 hasta P60,000 ag pwede pang papanaugan it penalidad nga perpetual disqualification sa pagbuyot it anumang posisyon sa gobyerno.
Kaungdan it SOCE ro tanan nga mga gingastos it mga kandidato sa nasambit nga eleksyon.
Sa pihak nga parte, apela ni Atty. Itulid sa mga magasumite kara sa deadline hin-aga nga habaan ro andang pasensiya kapin pa ag masyadong mapiot ro andang opisina.
Magabukas sigon ro andang opisina umpisa alas-8 it agahon hasta alas-5 it hapon.
Samtang, sa pagtapos it election period hin-aga nga adlaw, pagaduea-on eon man ro prohibitions sa gun ban, checkpoints ag iba pa.
