KALIBO, Aklan—Mabahoe ro pagpati it pamilya Ambay nga robbery ro posibleng rason it brutal nga pagpatay it “person of interest” nga si Mark Archie Torrefiel sa biktima nga si Bonna Hercia Ambay, reliever branch manager it sangka pawnshop sa banwa it Kalibo.
Suno kay Atty. Benjamin Candari Jr. nga mag-euwas sa robbery hay owa man nanda ginaduea ro posibilidad nga base ginhimuslan pa ro biktima antes nga ginpatay.
Ginasugid nga may naduea sa sueod it pawnshop kaeakip ro P4,000 ag cellphone it biktima.
Posible sigon nga ginpilit it suspek ro biktima nga buksan ro vault apang raya hay napas-eawan rason nga natabo ro krimen.
Base sigon sa andang pagpangusisa, gina-iba kada adlaw it pawnshop ro kombinasyon sa vault kung siin nakasueod ro mga alahas ag kwarta.
Apang, owa it prenda kung adlaw it Dominggo rason nga owa kasayod it kombinasyon ro biktima.
Ginahueat pa sigon nanda ro magiging resulta it ginpatigayun nga autopsy examination sa bangkay it biktima hin-aga, adlaw it Huwebes.
Plano sigon it pamilya Ambay nga ipasaka ro kasong robbery with murder kontra kay Torrefiel.
