BANGA, Aklan—Owa eon it mga usyusero sa Brgy. Polo ag Sigcay sa banwa it Banga kumpara ko nagtaliwan nga mga inadlaw nga nagadagsa ro mga tawo nga naga-abang sa resulta it ginapatigayon nga search and retrieval operation it mga rescue team, professional divers ag iba pang mga volunteers sa pageaum nga makita ro eawas it 15 anyos nga si Jhuros Flores.
Angot kara, mabahoe ro naging pagpasaeamat ni Joey Flores, ama it binatilyo sa tanan nga mga tawo nga nag-bulig ag nag-unong sa andang kalisod.
Ginhimo sigon it tanan ro andang masarangan apang napas-eawan gid nga makit-an ro eawas it unga.
Nasayuran nga nagpamisa ro andang pamilya para kay Jhuros.
Madumduman nga naging negatibo man ro ginpatigayon nga operasyon it MDRRMO Numancia sa coastal area nga sakop it Sitio Liboton, Bakhaw Norte ag Brgy. Camanci Norte.
