KALIBO, Aklan—Matapos ro ginpatigayon nga pag-bendisyon it kaparian, naging matawhay ag malinong eon ro panimaeay it pamilya Nabiong sa banwa it Libacao nga pilang adlaw man nga naka-eksperyensya it pag-gambala it gina-alegar nga itom nga kapre nga naka-istar sa puno it camansi.
Suno sa panganay nga unga it pamilya nga si Leosil Nabiong nga nabawasan eon ro kakueba ag kahadlok nga andang nabatyagan kamana man nga nakaangkon eon sanda it maayos nga tueog.
Nagaeaum sigon ro andang pamilya nga indi eon mauman ro hitabo kun siin pila sa andang propyedad ro nakaangkon it kasamaran.
Madumduman nga naputos it kahadlok ro pamilya Nabiong ko gabi-i it Lunes matapos nga magwasa-ag ro bugas nga may hurma pa it mabahoe nga alima sa saeog ag pagkapusa it bote it softdrinks halin sa andang baraka.
Naging sentro man it istorya ro pamilya matapos nga mag-eopok ro balita.
May pila man ka mga albularyo ukon manugbueong ro nagbisita sa pamilya para magpatigayun it ritwal ukon orasyon para sa ikalinong it pamilya.
Sa pihak kara, hugot man nga ginpamalibaran ni Leosil ro alegasyon it ibang tawo eabi eon sa social media nga naga-ubra eamang sanda it istorya para sumikat.
