KALIBO, Aklan—Ginpasaeamatan it lokal nga gobyerno it Kalibo ro pamilya pamatian eabi eon si Mrs. Lolita Pamatian sa gintau nga eugta agud nga maging extension it municipal cemetery sa parte it Calachuchi road, Brgy. Andagao, Kalibo.
Suno kay sangguniang bayan member Augusto Tolentino nga nagdihon imaw it resolusyon agud nga personal nga ipaabot ro pagpasaeamat sa nasambit nga pamilya ag ro pagbaton it munisipyo it andang gin donar it eugta nga may sukat nga 441 square meters.
Ro deed of donation hay ginbaton sigon it teatapan ni Kalibo mayor Juris Sucro ko Disyembre 7, 2023.
Sangka sueat man ro ginpadaea it alkalde nga nagapabutyag it anang pagpasaeamat.
Kadungan kara, ginpahayag ni Tolentino nga mabahoe nga bulig ro nasambit nga donasyon bangud sa naga-eksister nga problema sa paggutok it sementeryo sa banwa it Kalibo.
