KALIBO, Aklan—Nagakasubo makaron ro pamilya Venus it Brgy. Mambog, Banga kasunod it hinali nga kamatayon ni Ryan, 17-anyos ag pagkanina it ama kara nga si Aries Venus, 39-anyos, parehong helper sa truck nga naaksidente sa Brgy. Omio, Lemery, Iloilo.
Suno kay Mrs. Mary Anne Venus, naghalin ro mag-ama sa andang panimaeay bandang alas-3:30 it aga-aga paagto sa andang site sa Brgy. Tabayon agud nga magdeliver it garden set sa Sara, Iloilo.
Masakit para sa ina ro natabo sa anang mag-ama kon siin gusto man kunta nga buligan ni Aries ro anang onga apang inde man raya makahueag bangud nga nabali man ro anang alima.
Nadaea pa sa ospital si Ryan apang gindeklara nga patay eon it nagtatap nga doktor bangud sa naangkon nga fatal nga lastro sa nagkaeain-eain nga parte it eawas.
Samtang, nagdesisyon ro pamilya nga magpangayo eon lang it bulig pinansyal sa driver it truck nga si Larry Alfaro, 50-anyos it Brgy. Jugas, New Washington ag inde eon nanda raya pagpasakaan it kaso.
Si Alfaro hay presenteng idto sa kustudiya it Lemery police station.
Sa pihak nga parte, si Aries hay nagapabilin makaron sa Aklan provincial hospital para sa anang nagakaigong pagbueong.
Nasayuran nga pueo ro sakay it truck kaeakip ro driver kat nadueaan it kontrol ro behikulo sa pazigzag ag padeohugon nga karsada it Brgy. Omio rason nga nagdesisyon si Alfaro nga itumba ro saeakyan para maeowas ro andang kabuhi.
