KALIBO, Aklan—Eubus nga nagakabaeaka ro barangay council it Brgy. Tinigao, Kalibo bangud nga maskin ro andang chapel hay owa eon ginpatawad it mga maeain nga elemento matapos nga ginsueod ag ginbo-oe ro kwarta nga ginagamit para sa maintenance sa operasyon it kapilya.
Sa pihak kara, ginpahayag ni Tinigao Punong Barangay Lourdes Reyes nga may person of interest eon ro mga awtoridad sa nasambit nga insidente.
Mag-eowas kara, sigidas man ro pag-roving it mga tanod ag pulis sa andang lugar.
Nasayuran nga haeos tatlong beses eon nga ginsueod ag gintawan ro San Roque Chapel, kun sa siin sa daywang naunang insidente hay mga menor de edad ro may kahimuan.
Apang ro pinaka-ulihi nga insidente hay pagpanakaw guid ro tuyo bangud nga ginhana kara nga samaron ag gintabunan ro CCTV agud nga indi imaw makilaea.
Antes suno kana nga natabu ro panakawan ko nagtaliwan nga Disyembre 29 hay nakaangkon it meeting ro mga nagadumaea sa kapilya angot sa andang koleksyon rason nga mabahoe ro andang pagpati nga naga-bantay ro suspek.
Owa suno kana naga-aywan it mabahoe nga kantidad sa sueod it kapilya bangud nga bukon it eowas.
Nabo-oe it suspek ro kapin eamang sa 1,000 pesos.
Sa pag-review sa CCTV footage, nakita nga bandang alas-10:30 it gabi-i hay nag-umpisa nga maghaeughog ro suspek sa sueod it chapel.
Teorya it mga awtoridad nga planado it suspek ro pagpanakaw.
Sa makaron hay padayun ro imbestigasyon it kapulisan sa nasambit nga insidente.
