KALIBO, Aklan—Nagtapos eon makaron nga adlaw it Miyerkules ro passport on wheels nga haead it lokal nga gobyerno it Kalibo sa mga pumueoyo nga uwa pa it passport ag sa mga gustong magrenew.
Suno kay Santiago Sucaldito it Department of Foreign Affairs ukon DFA Manila, naging mabinungahon ag madinaeag-on ro tatlong adlaw nga pagproseso it mga dokumento it mga kliyente nga nakasueod sa pre-registration ko Mayo 17-20, 2022.
Ro nasambit nga programa hay may katuyuan nga mapaeapit sa mga pumueoyo ro serbisyo it ahensya partikular eon sa mga may eubus nga nagakinahang-ean kaparehas it mga overseas Filipino workers ukon OFW’s pinaagi man sa inisyatibo it LGU.
Raya hay eksklusibo eamang nga ginpatigayon sa mga taga banwa it Kalibo kon siin kapin sa 1,800 slots ro gin-alokar sa sueod it tatlong adlaw nga pagtinir it DFA sa nasambit nga banwa.
