BALITANG Espesyal —- Sangka kontrobersiyal nga pastor sa Tennessee ro nag-livestream it pagsunog nana it mga librong Harry Potter, Twilight ag iba pang mga nobela bangud nga suno kana, may kahilabtanan sa demonyo ro mga nasambit nga libro!.
Gin engganyo ni Pastor Greg Locke ro anang mga miyembro sa relihiyong Global Vision Bible Church nga isurender eon it mga raya ro kopya it andang librong Harry Potter, Twilight, Chronicles of Narnia ag iba pang fantasy novels agud nga sunugon.
Suno kay Locke, nakabaton imaw it senyales halin sa Diyos nga ipaiway anay ro komunyon ag magpatigayon it book burning event.
Ginpahayag it spokesperson it relihiyon, ro book burning event nga gin-livestream sa Facebook hay gin-organisa ni Locke agud nga mapugngan ro pagkalhit it witchcraft ag demonism nga sa tan-aw nana hay ginaturo it mga libro kapareho it Harry Potter.
Ginbatikos it pilang manugturo ag netizens sa U.S. ro nasambit nga event bangud nga sa tan-aw nanda hay owa nagakabagay sa tiempo makaron ro pagsunog it libro.
Suno kanda, mga barbaro ag makitid it utok eamang ro makahimo kara .
Dugang pa it iba, maeain raya sa palibot ag pointless eon ro pagbawae ag pagsunog it libro sa tiempo it internet bangud nga sang pindot eang sa gadget hay madali eon nga ma-access ro mga digital version it mga nobela kapareho it Harry Potter ag Twilight.
