KALIBO, Aklan—Ginduea it Philippine Coast Guard Boracay sub-station ro kabaeaka it publiko angot sa nagbisitang buwaya nga nakit-ang nagpaeangoy-eangoy sa kaeawran nga sakop it Sitio Sinagpa, Brgy. Balabag sa isla it Boracay nga ko ulihi hay madinaeag-on nga nadakpan sa pakikipagbueoligan it mga mangingisda, lokal nga gobyerno it Malay, life guard, mga residente ag maabong iba pa.
Suno kay Coast Guard Petty Officer second plus Arnaldo M. Salvador, Commander Coast Guard substation Boracay nga posibleng daea it maeain nga panyempo rason nga sa kauna-unahang kahigayunan hay may nadagsa nga buwaya sa isla nga unang nataeopangdan sa kaeayuon nga 50 meters maghalin sa shoreline nga may habang 10 feet, nagaeapad it 1 feet ag ginatantyang nagabug-at it inde magsobra sa 50 kilos.
Ginpaathag nga nadakpan ro buwaya matapos nga ginlambat kasunod it pagpanghina kara daea it kagaoy sa pag-eangoy ag gutom bangud sa mabaskog nga paghampak kana it baeod.
Sa makaron, ro nasambit nga buwaya hay idto eon sa pasilidad it Community Environment and Natural Resources Office ukon CENRO sa Brgy. Napaan sa banwa it Malay.
