KALIBO, Aklan—Epektibo ko Hunyo 28 hay ginsuspinde eon man it Philippine Coast Guard ro andang pagpasakay sa mga Locally Stranded Individual (LSI) pasueod sa Region 6 ukon Western Visayas.
Suno kay PO2nd Jerry Ehorango it PCG Malay, insigida nanda nga gin-impormahan ro mga PCG sub-station agud nga insigidang maabisuhan ro mga pasahero pabalik sa andang ginhalinan.
Ro solomente nga ginapasugtan nga makabyahe makaron hay ro mga authorize person’s outside residents ukon ro ginatawag nga APOR ag ro mga delivery sakay ro mga pahinante ag driver provided nga may travel authority ro mga raya ag medical certificate.
Sa makaron suno kana hay hugot ro andang monitoring ag pagbantay sa mga pantalan para masiguro nga uwa it LSI nga makasueod sa rehiyon pinaagi sa Caticlan port.
Apang, pwede gihapon sigon makabyahe ro mga paguwa it rehiyon partikular kon nagapa-Manila ro mga raya provided nga may mga nagakaigo sandang dokumento nga ginapakita sa oras nga sikyaron sanda it otoridad.
Nauna eon nga ginsuspinde sa sueod it daywang dominggo ro pagpauli sa mga LSI’s sa mga nasambit nga rehiyon bangud sa kabaeaka it mga natungdan nga LGU’s matapos nga madasig ro pagtaas it kaso it mga nagpositibo sa Covid-19 sa nasambit nga mga lugar.
