Ginpaiway ro pagbukas it klase sa mga eskwelahan bangud sa epekto it nagtaliwan nga bagyo. Mag-eowas sa nawasak ro mga kwarto ag pasilidad, may una man nga nagserbeng evacuation center sa mga nadaeasa. Haeos kada dag-on hay makaraya ro sitwasyon.
Kon may bagyo, apektado ro tanan kaibahan eon ro edukasyon. Puna it publiko, ro mga pagpaiway ngara hay resulta sigon it kapabayaan it gobyerno sa pagpahaom para sa mga kalamidad.
Haeos nasanay eon lang ro mga manugturo ag estudyante nga kada may kalamidad hay mapaiway ro paghatod it edukasyon. Anu ro natabo sa mga plano ag pondo para madasig nga maayos ro mga kwartong nasamad?.
Ham-an it hasta sa makaron hay uwa pa naaprubahan ro mabuhay eon nga proposisyon nga permanenteng evacuation center?. Ro pag-angkon it permanente ag maayos nga evacuation centers ro sambilog sa mga dapat iprayoridad it gobyerno bangud nga ro nasyon hay prone sa kalamidad.
Masobra sa 20 bagyo ro nagapanaeasa sa nasyon kada dag-on. May pag-eopok man it bulkan ag paglinog. Makaeoeooy ro mga apektado nga uwa it masilungan sa oras it kinahang-eanon.
Nakaeowas nga sa kalamidad, buwis-buhay man sa evacuation center nga siksikan, puwedeng magtaeapnan it sakit, uwa it maayos nga supply it malimpyong tubi ag pwede pang maeosutan it krimen. Umpisa eon it pagpanaeasa it mga bagyo, kunta umpisahan eon man ro pagpatindog it mga evacuation center.
