Nagdaog si Pinay boxer Nesthy Petecio sa women’s 57 kgs. round of round sa nagapadayon nga Paris Olympics. Naangkon ni Petecio ro unanimous decision kontra kay Jaismine it India sa hampang nga ginpatigayon kaina it aga-aga.
Halin sa una hasta sa last round hay dominado ni Petecio nga silver medalist ko Tokyo Olympics ro hampang. Ginpahayag nga gintun-an nana it mayad ro mga hueag it Indian boxer ag desidido imaw nga mapasaalima ro bueawan nga medalya.
Samtang sa pihak nga parte, napas-eawan si Pinoy boxer Eumir Marcial sa men’s 80 kgs. sa nagapadayon nga Paris Olympics. Nabuoe it nakaengkwentro kara nga si Turabek Khabibullaev halin sa Uzbekistan ro unanimous decision.
Sa unang round pa eamang hay ginamit it Uzbekistan boxer ro anang kataas ag haba it alima para maangkon ro score halin sa limang judges. Ginpilit it 28-anyos nga si Marcial nga makaeagas apang naging mailap ag madasig ro paglikaw it 20-anyos nga Uzbekistan boxer.
Matapos ro hampang hay ginpasaeamatan it Pinoy boxer ro mga nagsuporta kana ag nagpangayo imaw it pasensiya bangud sa anang naging kapas-eawan. Naging emosyonal man imaw bangud nga ginpaiway anay kara ro anang professional boxing career para tutukan ro hampang sa Olympics.
Mag-eowas sa daywang boksingero, napas-eawan man nga makaabante si Filipina swimmer Kayla Sanchez sa finals it women’s 100m freestyle sa nagapadayon nga Paris Olympics. Raya hay matapos nga nagtapos imaw Sanchez sa oras nga 54.21 seconds ag nabuoe ro ikapitong puwesto sa heat 2 ag 15th place sa overall standings.
