KALIBO, Aklan–Nakalista ro Provincial Health Office (PHO)-Aklan it kapin sa 560 nga kaso it dengue sa bilog nga probinsya umpisa Enero 1 hasta Agosto 27.
Raya hay mas mataas it kapin sa 1,789 percent kung igakumpara sa nailistang kaso sa kaparehong period ko nagtaliwan nga dag-on nga naga-abot eamang it 28.
Suno kay Roger Debuque, Sanitary Inspector it PHO-Aklan nga tatlo ro namatay nga ginakaeakipan it sangka senior citizen nga may comorbidity, sangka 16-anyos ag sangka 10 dag-on.
Ginaeauman eon sigon nanda ro pagtinaas it kaso makaron nga 2022.
Ro banwa it Ibajay ro nakalista it pinakamataas nga kaso nga naga-abot sa 113, Nabas nga may 94, Kalibo nga may 80, Malay nga may 74, Buruanga ag Banga nga may tig 28, Numancia nga may 24 nga kaso, Makato nga may 20, Libacao nga may 18, Malinao nga may 16, Tangalan nga may 13, New washington nga may 12, Lezo hay siyam samtang ro Batan ag Balete hay may tig 9 nga kaso, Madalag nga nakalista it pito ag an-om sa Altavas.
May kaangtanan kara, nagapadayun man ro monitoring ag rector surveillance it PHO sa mga kabanwahanan nga nakalista it mataas nga kaso.
Engkaso sigon nga makabatyag it mga sintomas it dengue insigida eagi nga magpakonsulta sa doktor para sa nagakaigo nga medikasyon.
Ginlaygayan man kara ro publiko nga ugalion nga maglimpyo sa palibot para makalikaw sa mga namok nga may daea nga dengue virus.
