KALIBO, Aklan–Uman nga ginpadumdum it provincial health office ukon PHO-Aklan ro publiko nga indi pagbalewalaon ro angkit ukon maskin kaeos it ayam ag iba pang sapat.
Raya hay kasunod it natabu nga pagkamatay it 5 nga residente it probinsiya it Aklan bangud sa rabies umpisa enero hasta setyembre it makaron nga dag-on.
Sa listahan it PHO, ap-at sa mga biktima hay puro eaeaki ag sambilog ro babaye nga naga-edad it 12-anyos.
Ginasugid nga gin angkit imaw it anang alagang ayam, apang owa nagsugid sa anang mga ginikanan.
Gindaea raya sa ospital nga ro anang kundisyon hay matsa “bang-aw eon nga ayam” nga naga-waeas.
Imaw ro pinakabata sa mga biktima samtang 53-anyos nga eaeaki ro pinakamagueang.
Tatlong kaso ro nailista ko Agosto samtang ro tig- sambilog hay ko Pebrero ag Setyembre.
Ginpahayag nga ro mga “asong kalye” ro rason it pagtaas it kaso it rabies sa probinsiya.
Sa pihak nga parte, ginlaygayan it PHO ro publiko nga mag-agto sa animal bite treatment centers sa mga rural health units ag iba pang pribadong ospital sa oras nga maangkit it ayam ag iba pang sapat.
Ro rabies hay virus nga ginapasa sa tawo it ayam nga infected pinaagi sa angkit ukon eaway.
Owa it bueong kon nagpositibo eon sa rabies rason nga raya hay makamaeatay.
Pwede sigon raya nga maagapan.
Ginrekomenda pa nga kada dag-on hay dapat nga pabakunahan ro mga ayam agud nga protektado ro mga alaga halin sa virus.
