KALIBO, Aklan—Ginkumpiska it lokal nga gobyerno it Kalibo ro pila ka mga negosyo it mga dayo nga vendors maghalin sa kaeapit nga probinsya it Iloilo, Bacolod ag iba pa matapos madiskubrehan nga peke ro andang ginagamit nga permit.
Ginpaathag ni John Peter Madula it LGU Kalibo nga base sa andang monitoring ag inspection hay nataeopangdan nga sambilog eamang ro andang ginboe-an it permit apang ro andang negosyo hay may una nga tatlo hasta ap-at nga karito.
Ginxerox sigon nanda ro dokumento pati ro ID rason nga ginkumpiska nanda ro mga raya ag temporaryong ginhold.
Unfair suno kana sa ibang mga pumueoyo eabi eon sa mga vendor nga Kalibonhon ag Aklanon nga legal ro andang pagbaligya sa sidewalk sa nagapadayon nga week-long celebration it Kalibo Sr. Sto. Niño Ati-Atihan Festival 2023.
Sa pihak kara, ginklaro ni Madula nga insigida man nga nagsikyar it nagakaigong permit ro mga tag-iya it confiscated nga karito ag kat ginpresentar eon ro legal nga dokumento hay insigida man nanda raya nga ginrelease ag nagapadayon eon sa pagbaligya ro nasambit nga mga vendors.
Mataeopangdan nga waea-tuo ro mga nagkaeain-eain nga baligya eabi eon sa festival zone area kon sa siin ginaeauman it mga vendors ag negosyante nga makabawi sanda makaron nga okasyon.
