Magapatigayon it people’s state of the nation address ro Gabriela Women’s Organization kaibahan ro Bagong Alyansang Makabayan ag iba pang organisasyon kasunod it igapatigayon nga kauna-unahang State of the Nation Address ukon SONA ni Pangueong Ferdinand Marcos Jr. sa adlaw it Lunes, Hulyo 25, 2022.
Suno kay Lucy Francisco, regional coordinator it nasambit nga organisasyon nga raya hay pagatambungan it andang mga miyembro ag iba pa nga gustong magpasakop sa andang aktibidad.
Raya ro andang pamaagi agud nga maipaabot ro hinaing it mga pumueoyo partikular it mga pamatan-on nga nakaeksperyensya it pandemya, epekto it sigidas nga pagtinaas it produktong petrolyo ag ro gutom nga nagaeksister sa mga kubos nga indibidwal.
Ginakabig it grupo nga sanda ro magiging boses it mga Pilipinhon sa gusto matabo it mga raya sa administrasyon it Marcos Jr.
Maabo suno kana ro problema nga dapat solbaron it gobyerno bangud nga ro nagasakripisyo kara hay ro kubos nga mga pumueoyo ag raya ro andang gustong mabatian sa unang SONA it bag-ong presidente.
