KALIBO, Aklan—Nagtuga it pagkabaeaka sa mga pumueoyo ro pagkasamad it pilang porsyon it seawall sa bahin it Brgy. Tambak, New Washington.
Suno kay Punong barangay Lucille Macario it nasambit nga lugar, masyadong delikado ro sitwasyon eabi pa ag maabo ro mga panimaeay sa lugar.
Ko buean it Marso kat una nana raya nga ginreport sa Department of Public Works and Highways (DPWH)-Aklan matapos nga makit-an ro maisot pa eamang nga buho ko rato nga tyempo.
Insigida man sigon nga naghimo it aksyon ro taeatapan ag nagbutang it mga warning device para magserbing paandam sa mga residente.
Apang, raya eamang Oktobre kat eubusang mag-collapse ro porsyon it seawall tuga it na-eksperyensyahan nga Low Pressure Area (LPA) ag gindunganan pa it high tide.
Bangud kara, nagakabaeaka sigon sanda para sa kaeuwasan it mga pumueoyo.
Sa pihak nga parte, ginpaathag man ni Engr. Joey Ureta, Maintenance Division Head it DPWH-Aklan nga nagpadaea eon imaw it mga tawuhan idto sa lugar para magpatigayun it layout.
Ginabuebanta nga naga-abot sa 40 meters ro nasamad nga porsyon it seawall.
Ro paga-ubrahon sigon nanda nga temporaryong solusyon hay magbutang it sand bag para malikawan ro pag-eapad it baybay.
Sa makaron, nagahueat pa ro taeatapan it pondo para maumpisahan ro konstruksyon sa mas madali nga panyempo.
