KALIBO, Aklan–Kaibahan ro Pilipinas sa listahan it mga nasyon nga nagapameligro nga maka-experiensiya it nagkaeain-eain nga klase it kalamidad nga may kaangtanan sa madasig nga pagbaylo it kondisyon it atong tiempo bangud sa climate crisis.
Raya ro ginpahayag ni Dr. Rebecca Tandog-Barrios, sangka environmentalists ag educator sa probinsiya it Aklan.
Suno kana nga kinahangean ro paghueag ag pagbueuligan it gobyerno ag komunidad agud nga malikawan ro maeain nga epekto it weather events nga may kaangtanan sa climate emergency.
Kaibahan kara ro mga mabaskog nga bagyo nga naexperiensiyahan it nasyon nga pumatay it maabu nga mga tawo.
Mag-eowas sa mga mabaskog nga bagyo hay naexperiensiyahan eon man suno kana it pilipinas ro sobrang init it paniempo ko nagtaliwan nga mga dinag-on.
Kabay suno kana nga makaangkon it partisipasyon ro tanan agud nga mabawasan ro pag-emit it carbon dioxide agud nga mapanaba ro earth temperature ag malikawan ro pagkatunaw it yelo sa north ag south pole.
Kon nagakatunaw sigon ro glacier hay nagataas ro lebel it tubi sa kaeawran nga magiging rason it pagka-eumos it mga manaba nga lugar.
Kumpara sa ibang mga manggaranon nga nasyon nga apektado it climate crisis nga may nagakaigo nga suporta ro gobyerno sa andang mga apektadong residente , apang mabudlay raya sa mga nagakalisod nga Pinoy.
Ginsuhestiyon ni Dr. barrios nga makaintigo eon ro kada isaea nga magpangabuhi ag maging resilient sa nagkaeain-eain nga mga weather events ag likawan ro paggamit it mga plastic, amligan ro kabukiran, wildlife ag iba pa.
