Balitang Espesyal —- Nagabalor it $214 dollars ro ginakabig nga pinakamahae nga sandwich sa bilog nga kalibutan.
Owa pa it may nakapiyerde sa nasambit nga record sa sueod it pitong dag-on. Gintawag ro nasambit nga daywang bilog nga French Pullman champagne bread sandwich nga “Quintessential Grilled Cheese” ag makit-an raya sa Serendipity 3 restaurant sa New York.
Simple eang kun tan-awon ro itsura it tinapay, apang naga angkon raya it pilang pinaka eksklusibong sangkap sa kalibutan kapareho it Dom Perignon champagne ag white truffle butter.
Ro nagapangunang sangkap kara nga Caciocavallo Podolico cheese nga naghalin pa sa Italy nga ginpalaman sa daywang tinapay ag ro gold flakes nga palamuti hay pwedeng kaunon .
Raya hay ginaserbi sa mga kostumer kaibahan ro tasa it South African Lobster Tomato Bisque dipping sauce sa Baccarat Crystal plate.
Base pa sa report, ro nasambit nga sandwich hay kinahangean nga i-order 48 oras it mas temprano bangud nga ro tanan nga mga sangkap hay espesyal nga igabyahe pa sa kahawaan.
Ro Serendipity 3 restaurant hay bukon eamang it kilaea bilang may buyot it Guiness World Record para sa pinakamahae nga sandwich sa bilog nga kalibutan , ginabuytan man nanda ro pinakamahae nga desert, hamburger ag hotdog.
Makit-an man kara ro pinakamabahoe nga wedding cake ag pinakamabahoe nga tasa it hot chocolate.
