KALIBO, Aklan — Padayun nga nagatinguha ro Aklan Police Provincial Office (APPO), Land Transportation Office (LTO) ag iba pang natungdan nga ahensiya it gobyerno para sa mas hugut nga pagpatuman it mga laye angot sa road safety ag responsible driving tuga it sunud-sunod nga aksidente sa karsadahon sa sueod it makaron nga domingo.
Suno kay Gary Vilmer Taytayon it Provincial Disaster Risk Reduction and Management Office (PDRRMO)-Aklan nga naimbitahan man sanda para sa sangka pueong angot sa road safety nga makabig nga importante agud nga malikawan ro mga disgrasya sa daeanon.
Nauna eon nga ginpahayag ni P/Capt. Aubrey Ayon, tagapaghambae it Aklan PPO nga gintaw-an nanda it importansiya tatlong “E” sa road safety nga ginaeakipan it engineering, enforcement ag education.
Dugang pa ni Taytayon nga plano man it LTO nga magpatigayon it lecture sa mga eskwelahan bangud nga kaeabanan sa mga naeakot sa aksidente hay mga pamatan-on nga owa it driver’s license.
Samtang, ko unang quarter it 2024 hay nakalista ro PDRRMO it kapin sa 30 hasta 35 nga mga vehicular accidents nga andang ginrespondehan nga mas manaba kumpara makaron nga 2025 sa kaparehong period.
